Naturaren Ahotsa
Buztanikara zuria
Latinez: Motacilla alba
Gaztelaniaz: La lavandera blanca o aguzanieves
Ingelesez: The White Wagtail
Frantsesez: La Bergeronnette grise
Ezaugarriak
Ezaugarririk deigarriena, lema–luma zuriz apaindutako buztan beltz luzea
da, lurretik dabilen bitartean etengabe gora eta behera kulunkatzen
baitu. Azpitik zuria da, eta ipurtxuntxurrak, bizkar osotik zabaltzen
den kolore gris argi bera du. Silueta lerden eta xehea du, nolabaiteko
dotoretasuna dariolarik. Bere taldearen bereizgarria den hegaldi uhinduan,
buztaneko kanpoaldeko lema–lumak nabarmentzen dira, bitartean Txuiiit
bezalako soinu laburra errepikatzen duelarik. Ez dago beste buztanikarekin
nahasterik, beste biek kolore horiak baitituzte.
Tamaina
Luzera: 19 cm.
Hego–luzera: 30–32 cm.
Pisua: 20–27 g.
Biologia
Euskal Herrian sedentario modura jokatzen du, neguan bere populazioa
nabarmenki handitzen delarik. Emeak habia hormetan, zubietan, teiletan…
eraikitzen du; ondoren 5–6 arrautza errungo ditu. Inkubazio aldia 12–14
egunetan zehar luzatzen da eta, eklosioaren ondoren, txitek oraindik
beste 15 egun emango dituzte habian. Normalean urtean bi txitaldi egoten
dira. Neguan zehar, etzalekuetan hamarnaka hegazti ere elkartu daitezke.
Elikadura
Intsektuz elikatzen da, eta gehienetan lurrean harrapatzen baditu ere,
airean ehizatzeko gai ere bada.
Habitata
Habitat guztietan aurki dezakegu, kostaldetik, landa, erreka, zabortegi,
herri eta beste hainbat lekuetaraino, basoetan izan ezik, eremu zabaletara
moldatutako txoria baita. Habitatak buztanikara–mota desberdinen artean
banatuko bagenitu, honelako sailkapena egingo genuke: buztanikara horia
erreka, errekasto eta latsetan; larre buztanikara ingurune heze, padura
eta urezko beste hainbat eremutan; eta zuria giza inguruneetan, bertan
arrunt samarra denez, erraz beha daitekeelarik.
NATURAREN AHOTSA aldizkaritik hartuta.
Gehiago irakurtzeko sakatu hemen.