Naturaren Ahotsa
Aliota artikoa
Latinez: Gavia arctica
Gaztelaniaz: El colimbo ártico o gavia ártica
Ingelesez: Black-throated Diver
Frantsesez: Le plongeon arctique
Ezaugarriak
Beste bi alioten tarteko tamaina du, baina itxuraz Aliota handiaren
antz handiagoa duelako, inoiz harekin nahasteko arriskua dago. Neguko
lumajeak muga argi eta garbia dauka goiko aldearen (berun-gris uniformekoa
da) eta behekoaren artean (hori-zuri garbikoa da). Gazteen bizkarrean
lumajea ez da hain uniformea.
Igeri egiten duenean, oso era berezian saihetsetako atzeko aldean triangelu
zuria erakusten du. Udan helduen lumadian bizkarreko xake-itxura eta
buru eta lepo gris uniformeetako eztarri beltza nabarmentzen dira. Oso
lepo eta buru sendoak ditu eta mokoa gris argi eta indartsua. Hegaz
ari denean Aliota txikiaren antzekoa da, baina hegaldi indartsuagoa
du. Lumajeko kolore-desberdintasuna dela-eta atentzioa ematen du.
Tamaina
Luzera. 51-61 cm.
Hego luzera: 97-110 cm.
Biologia
Batik bat aintzira handietan egiten du habia eta negua kostaldeko zonetan
eta estuarioetan igarotzen du. Banaketa holoartikoa du espezie honek.
Habia egiteko lurralde nagusia Mendebaldeko Europan Eskandinavian du,
eta neurri apalagokoan Eskozian.
Elikadura
Arrainez elikatzen da, hauek 50 metrotako sakonetaraino murgilduz itzelezko
trebetasunez harrapatzen dituelarik. Murgiltzeko, ubarroien modura salto
egin beharrean, modu zuzenean egiten du. Behin eta berriro ikus daiteke
murgiltzen, batere uhinik sortu gabe, eta sartu-irten azkar horietan
uretatik kanpo burua soilik ateratzen duela, igeri egiteko gai da, gero
berriro ere urperatzeko.
Habitata
Espezie honetakoak gutxitan ikusi izan dira euskal itsasaldean. Gernikako
itsasadarrean halakoren batzuk ikustea izan dugu, azaroaren azkenetik
urtarrilera arte. Ugaltzeko tokia Europako iparraldeko lakuetan, erreketan
eta aintziretan dago, baina negua heltzerakoan gure kostaldeko ur gazietan
topatuko dugu. Negutzeko, arrantza ugariko eta gutxi kutsatutako badiak,
kaiak eta itsasadarrak gogoko ditu.
NATURAREN AHOTSA aldizkaritik hartuta.
Gehiago irakurtzeko sakatu hemen.